శ్రీగురువన్దనమ్
శ్రీగురుభ్యో నమః
శఙ్కారూపేణ మచ్చిత్తం పఙ్కీకృతమభూద్యయా
కిఙ్కరీ యస్య సా మాయా శఙ్కారాచార్యమాశ్రయే
ప్రహ్లాదవరదో దేవో యో నృసింహః పరో హరిః
నృసింహోపాసకం నిత్యం తం నృసింహగురుం భజే
శ్రీసచ్చిదానన్దశివాభినవ్యనృసింహభారత్యభిధాన్ యతీన్ద్రాన్
విద్యానిధీన్ మన్త్రనిధీన్ సదాత్మనిష్ఠాన్ భజే మానవశమ్భురూపాన్
సదాత్మధ్యాననిరతం విషయేభ్యః పరాఙ్ముఖమ్
నౌమి శాస్త్రేషు నిష్ణాతం చన్ద్రశేఖరభారతీమ్
వివేకినం మహాప్రజ్ఞం ధైర్యౌదార్యక్షమానిధిమ్
సదాభినవపూర్వం తం విద్యాతీర్థగురుం భజే
అజ్ఞానాం జాహ్నవీతీర్థం విద్యాతీర్థం వివేకినామ్
సర్వేషాం సుఖదం తీర్థం భారతీతీర్థమాశ్రయే
విద్యావినయసమ్పన్నం వీతరాగం వివేకినమ్
వన్దే వేదాన్తతత్త్వజ్ఞం విధుశేఖరభారతీమ్
పఞ్చాశల్లిపిభిర్విభక్తముఖదోః పన్మధ్యవక్షస్థలాం
భాస్వన్మౌలినిబద్ధచన్ద్రశకలామాపీనతుఙ్గస్తనీమ్
ముద్రామక్షగుణం సుధాఢ్యకలశం విద్యాఞ్చ హస్తామ్బుజైః
బిభ్రాణాం విశదప్రభాం త్రినయనాం వాగ్దేవతామాశ్రయే

శ్రీమత్పరమహంస-పరివ్రాజకాచార్యవర్య-
పదవాక్యప్రమాణపారావారపారీణ-యమనియమాసనప్రాణాయామప్రత్యాహారధారణాధ్యానసమాధ్యష్టాఙ్గయోగానుష్ఠాననిష్ఠ-
తపశ్చక్రవర్తి-
అనాద్యవిచ్ఛిన్నశ్రీశఙ్కరాచార్యగురుపరంపరాప్రాప్త-షడ్దర్శనస్థాపనాచార్య-
వ్యాఖ్యానసింహాసనాధీశ్వర-సకలనిగమాగమసారహృదయ-
సాంఖ్యత్రయప్రతిపాదక-వైదికమార్గప్రవర్తక-సర్వతన్త్రస్వతన్త్ర-
ఆదిరాజధానీ-విద్యానగరమహారాజధానీ-కర్ణాటకసింహాసనప్రతిష్ఠాపనాచార్య-
శ్రీమద్రాజాధిరాజగురు-
భూమణ్డలాచార్య-ఋష్యశృఙ్గపురవరాధీశ్వర-
తుఙ్గభద్రాతీరవాసీ-
శ్రీమద్విద్యాశఙ్కరపాదపద్మారాధక-
శ్రీమజ్జగద్గురు-శ్రీమదభినవవిద్యాతీర్థమహాస్వామిగురుకరకమలసఞ్జాత-
శ్రీమజ్జగద్గురు-శ్రీభారతీతీర్థమహాస్వామినాం-తత్కరకమలసఞ్జాత-
శ్రీమజ్జగద్గురు- శ్రీవిధుశేఖరభారతీమహాస్వామినాం చ
చరణారవిన్దయోః సాష్టాఙ్గప్రణామాన్ సమర్పయామః